R o ß b a c h , m e i H o a m a t

Koa schöners Fleckerl gibt´s auf dera Welt,
gabat´s nöt her, um nu so vui Geld,
möcht a koan Tausch gegen irgendwo,
a so a schöne Hoamat, is koa zweites moi do.

Da bin i geborn, tieaf verwurzelt mei Stamm,
vertraut sind ma d´Felder, d´Wiesn und Bam,
d´Hügl und Täler, da Woid und da Bach,
g´hörn grad so daher, wia dö Vögerl auf´s Dach.

Und jede Jahreszeit hat bei uns da sein Reiz,
wenns woam is, dann rengt´s, im Winter da schneit´s,
dös Frühjoha voll Frische, wias nöt schöner sei kunt,
da Herbst mit seine Farb´m, so leuchtend, so bunt.

Gehst hinum, gehst herum bei uns in der Gmoa,
es wird sö immer wieder, a schöner Blick für di auftoa,
wennst wanderst durch Gegend mit offene Aug´n,
dann spürst drinn a Gfühl, nur da tuats ma taug´n.

Versteh´n tua i d´leut, wenn´s mit mir toan a Red,
da brauch i koa Lexikon oder Dolmetscher nöt,
sie red´n so wia i und die Sprach hab i gern,
es is hoit dö Sprach, dö ma d´Muatta hat glernt.

Drum möcht i nöt fort da, nöt um koan Preis,
i g´hör nur daher, i will goa nichts Neus,
könnt schöner woi sei nirgends, dös kann goa nöt geb´m,
z´Roßbach wo i dahoam bin, ja nur da möcht i leb´m.

(Günter Bauschenberger)